«Пастушка і рок»: цікавосткі з жыцця Дануты Бічэль

“Пастушка і рок”: цікавосткі з жыцця Дануты Бічэль

3 снежня курсы “Мова нанова” да 81-годдзя знакамітай гарадзенскай пісьменніцы Дануты Бічэль зладзілі вечарыну ў прасторы Цэнтру гарадскога жыцця. У гэты вечар сумна не было: чыталі і спявалі вершы Дануты Янаўны знатны рок-музыка Алесь Дзянісаў і бард Вольга Хвашчынская. Выступіла з успамінамі і сама імянінніца, паказаўшы, наколькі цікавае жыццё паэта-класіка.

Чаму напісана, што Дзень нараджэння 1 студзеня, а адзначаецца 3 снежня?

“Гэта – памылкі майго жыцця, маёй дурноты, гэтак сказаць. Наш касцёл згарэў, згарэлі нашыя метрыкі ў Іўі (вёска нашая адносілася тады да Іўеўскай парафіі). Калі нам выпісвалі паўторныя метрыкі, мы казалі даты адвольна. Сяброўка сказала 8 сакавіка, а я сказала 1 студзеня. Падманула жыццё на гэтыя 20 з нечым дзён”.

Калекцыянерка: з чаго пачынаўся Музей Максіма Багдановіча?

“Музей М.Багдановіча збірала ўсё жыццё. Была нейкая такая не ярка выражаная калекцыянерка, нешта ўсё збірала. Я збірала арэшкі, калі была малая. Каб было потым з чым зімой гуляць. Каменьчыкі розныя…Як усе дзеці.Потым я збірала кнігі. І калі прыйшла ў музей, то ў мяне была сабрана добрая калекцыя. Бо я ездзіла ў Мінск на розныя сустрэчы і брала кніжачкі, прасіла ў Караткевіча, Шамякіна, Мележа, ва ўсіх класікаў, каб яны мне падпісалі. І гэта склала асноўны фонд Музея Максіма Багдановіча”.

Ці дапамагае анёл-ахоўнік пісаць вершы?

“Максім Багдановіч быў, гэтак сказаць, маім анёлам-ахоўнікам. Каб мне ў дзяцінстве сказалі, што я потым буду яму служыць, то, можа, не паверыла б. Алё ён стаўся нейкім анёлам-ахоўнікам… Бо таксама нарадзіўся неўзабаве [9 снежня]. Я была шчаслівая ў жыцці. Я любіла літаратуру, пісала вершы. Вершы пішуцца па-рознаму. Тое, што называецца натхненнем, я цяпер стала называць “на бяспамяцтве”: калі ты пішаш і не памятаеш. Нехта нябачны водзіць тваёй рукой…”

“Мост Святога Францішка”

“Анатоль Брусевіч, мой крытык, дзеліць творчасць на тры перыяды: дамузейны, музейны і паслямузейны. Але я так гавару: перыяд, калі была пастушкай, настаўніцай, а потым - духоўная паэзія. У гэтым стагоддзі выйшла на духоўную паэзію… “Мост Святога Францішка” – успаміны пра хлопцаў, мужчын майго жыцця. Сярод іх і Адам Міцкевіч, і Чэслаў Мілаш, і Чэслаў Неман… За ўсё жыццё мне дапамагалі і Аляксей Карпюк - завёз мае друкаваныя на машынцы вершы ў Мінск, для першага зборніка; і Анатоль Вялюгін – рэдактар, а праводзіў гэтую першую кнігу праз выдавецтва Алесь Адамовіч; Рыгор Барадулін прыдумаў загаловак да зборніка “Нёман ідзе”; Міхась Скобла і Анатоль Сыс прывезлі мне ўжо надрукаваную кнігу “Снапок”; Павал Мажэйка надрукаваў зборнік “Хадзі на мой голас”…

Народная слава

Рок-музыка Алесь Дзянісаў зазначыў, што “Данута Бічэль – … гэта жывы класік, бо ўжо няма Рыгора Барадуліна і ўсіх астатніх, каго мы далучаем да класічнай беларускай літаратуры. Давайце шанаваць жывога класіка!”

Данута Янаўна кажа, што ў інтэрнэце часта бачыць, як яе вершы пераробліваюць. 

“Оля [Хвашчынская] надта мае вершы перароблівае. Я ёй гэта дазваляю”. 

Той факт, што наведвальнікі сусветнай павуціны выкарыстоўваюць вершы Дануты Янаўны (хоць і пераробліваючы іх), кажа аб многім. Народная слава была, ёсць і будзе крочыць з нашай выдатнай паэткай.